Henry Moore

Henry Moore
Henry Moore in sy ateljee in Engeland, 1975
Geboortenaam	Henry Spencer Moore
Gebore	(1898-07-30)30 Julie 1898 Castleford, Yorkshire, Engeland
Sterf	31 Augustus 1986 (op 88) Much Hadham, Hertfordshire, Engeland
Laaste rusplek	Perry Green-kerkhof, Much Hadham, Hertfordshire, Engeland
Nasionaliteit	Verenigde Koninkryk
Veld	Beeldhouwerk, tekening, grafika, tekstiele
Opleiding	Leeds School of Art, Royal College of Art
Beweging	Bronsbeeldhouwerk, modernisme
Werke	Liggende figure, 1930's–1980's

Henry Moore (30 Julie 1898 – 31 Augustus 1986) was 'n Engelse beeldhouer wat bekend is vir sy brons- en klipbeelde van die mens wat in sy elementêre en gereduseerde vorm weergegee word. Drie hooftemas kan in sy werk onderskei word, naamlik moeder en kind, liggende figuur en familie.

Henry Moore is op 30 Julie 1898 in Castleford (Yorkshire) gebore. Hy wou as kind reeds 'n beeldhouer word. Ná 2 jaar se opleiding aan die Leeds School of Art is hy in 1921 na die Royal College of Art in Londen. Die kunswerke in museums wat hy besoek het, het 'n groter invloed op sy werk gehad as die akademiese onderrig wat hy ontvang het, en in sy vroeë werke is elemente van die Egiptiese, Babiloniese, Argaïese, Etruskiese en Oud-Mexikaanse kuns, sowel as elemente van die primitiewe kuns van Afrika en die Suidsee-eilande te bespeur. Moore se beelde word bepaal deur sy suiwer gevoel vir massa en volume, vlak en Iyn, holtes en kurwes en 'n eenheid van begrip. Van die begin af kon daar 3 hooftemas in sy werk onderskei word, naamlik moeder en kind, liggende figuur en familie, meestal oergestaltes met 'n magiese krag wat tot die toeskouer spreek.

Aanvanklik is Moore beïnvloed deur tydgenote soos Jacob Epstein (1880–1959) en Jean Arp (1887–1966), maar ná 1930 het sy werk selfstandiger geword. Geërodeerde vorme van skulpe en kieselstene wat deur die see glad geskuur is, het toe die inspirasie vir sy geabstraheerde menslike gedaantes gevorm. In 1928 het hy sy eerste opdrag, Noordewind, vir 'n Londense stasie ontvang. Sy Liggende vrou (1929), wat in die Leeds City Arts Galleries staan, is 'n oorspronklike vertolking van 'n rustende figuur op 'n Etruskiese sarkofaag.

Sy indrukwekkendste groepstandbeeld is die Drie Staande Figure in die Battersea Park in Londen (1947/48). Moore het in die veertigerjare vir die eerste keer in brons begin werk. Voorheen het hy direk in klip of hout gewerk, soms met die hulp van 'n kleimodel. Een van sy eerste bronswerke is Die Familie (1945 tot 1949). wat in die Museum of Modern Art in New York opgeneem is. Sedert 1950 het hy feitlik net in brons gewerk.

In 1980 het Moore sy rug beseer en daarna kon hy nie meer groot opdragte uitvoer nie. Sy beelde was van veel kleiner formaat en hy het hom veral op die tekenkuns toegelê. Moore het hom reeds gedurende die Tweede Wêreldoorlog as vaardige tekenkunstenaar bewys met sy sketse van mense in Londense bomskuilings. Hy het ook gebruik gemaak van houtskool, waterverf, potlood, pastel, balpuntpen en gouache. Afgesien van figuurstudies het hy ook studies van landskappe, renosterskedels en binnenshuise tonele gedoen.

Henry Moore is op 31 Augustus 1986 in sy huis in Much Hadham, Hertfordshire oorlede waar sy liggaam in die Perry Green-kerkhof begrawe is. Hy was 88 jaar oud.